Златните монети на бугарскиот цар Фердинанд се меѓу најбараните во светот

Златните монети на цар Фердинанд се меѓу најценетите нумизматички примероци не само во Бугарија, туку и во светот. Тоа го изјави за БНР – Радио Софија проф. Константин Дочев, експерт по нумизматика.

Според него, јубилејните монети кои Бугарската народна банка периодично ги пушта во оптек отсекогаш предизвикувале големо внимание, а во последните години нивниот број значително се зголемил. Интересот и пазарната вредност зависат од тиражот и од поводот за кој монетите се издаваат.

Проф. Дочев потсетува дека уште во 1879 година Кнежевството Бугарија го донесува Законот за Бугарската народна банка, а две години подоцна – и Законот за сечење монети. Првите издадени биле бронзени апоени од 2, 5 и 10 стотинки, следната година биле пуштени сребрени монети, а во 1897 година со нов закон е воведен златниот лев како основна парична единица.

„Монетите на цар Фердинанд не се барани само заради цената на златото. Тие се поврзани со нашата државност и историска традиција“, истакна нумизматичарот.

Тој додаде дека Бугарија одамна е подготвена за воведување на еврото, потсетувајќи дека уште по Ослободувањето бугарските државници поднеле барање за членство во Латинската монетна унија предводена од Франција. Иако земјата не била примена, златниот лев бил еднаков по вредност и авторитет со француската златна монета од 20 франци, што овозможувало слободно патување и финансиска стабилност.

Проф. Дочев упати апел монетите да не се дупчат и претвораат во накит, бидејќи секоја отсечена монета претставува не само парично средство, туку и културна и историска вредност, а во одредени случаи има и романтична симболика.

Според него, кај банкнотите критериумите и разликите се многу поголеми, поради што бројот на нивни колекционери е значително помал.

Извор:https://tribuna.mk/