Поетската збирка „Патот кон Гвадалахара“ на Поли Муканова беше претставена во Младинскиот културен центар во Скопје

Во Младинскиот културен центар во Скопје синоќа беше промовирана поетската збирка „Патот кон Гвадалахара“ на бугарската поетеса Поли Муканова, издание на издавачката куќа PNV Publishing, јавува БТА. Настанот го модерираше извршната директорка на издавачката куќа, писателката Јулијана Величковска.

Преведувачот Зоран Јакимоски во своето обраќање истакна дека поезијата на Муканова е „сочна, инспиративна и ослободена од патетика“, додавајќи дека во својата преведувачка практика не сретнал аналог на „оваа автентична и оригинална поезија“.

Според Величковска, „Патот кон Гвадалахара“ претставува збирка поетски патокази што водат од една земја во друга, од минатото кон иднината, од сегашноста во сите правци. „Ако некогаш сите патишта воделе кон Рим, тогаш во оваа стихозбирка Поли Муканова нè насочува кон човечкото срце“, рече таа.

Ова е трета книга на Муканова претставена пред читателската публика во РС Македонија. Таа е поетеса, преведувач и универзитетски професор родена во Софија, каде што предава историја на книгата и библиотеките, теорија на читањето и библиофилството на Универзитетот по библиотекознание и информациски технологии. Авторка е на шест книги од уметничка литература и две научни монографии, како и уредник на литературниот веб-сајт и издавачка платформа „Сбориште на трубадури“ од 2010 година. Нејзината поезија е преведена на девет јазици.

Извор:https://tribuna.mk/