Божикната магија започнува уште во ноември: Софија во украси, базари и празнична атмосфера

Оваа година, Божиќ „пристигна“ во Софија уште во ноември со арома на греано вино, цимет и празнична магија. Радио Бугарија ви препорачува да посетите некои божиќни катчиња во главниот град:

За оние кои најмногу сакаат да го пречекаат празникот

Од средината на ноември, германскиот божиќен пазар Deutscher Weihnachtsmarkt Sofia ја претвори Градската градина пред Националниот театар „Иван Вазов“ во романтично германско село. До 21 декември, дрвените куќи со германски имиња ќе нè мамат со ароматични братвурстови, слатки и греено вино со цимет и каранфилче. Централната сцена на пазарот ќе оживува секој ден со детски театар, училишни хорови и вечерни концерти, а по 18:00 часот, Дедо Мраз ќе го посети пазарот и ќе ги воодушеви младите и старите со своето присуство и хумор. Дел од приходите ќе бидат донирани во добротворни цели, претворајќи го празникот во гест кон луѓето во неповолна положба.

Магијата на Божиќ е донесена и во НДК

Неколку дена подоцна, на 21 ноември, празнично расположение ќе го зафати и Националниот дворец на културата со Софија Божиќен фестивал 2025. Ќе има тезги на мајстори-занаетчии и производители на автентични бугарски сувенири. На плоштадот, над 40 дрвени куќички, панорамско тркало, лизгалиште и концертна сцена ќе ги пречекуваат жителите и гостите на градот до крајот на декември. Аромата на бор и неодоливите божиќни закуски ќе се веат околу големата елка, а музиката и насмевките на продавачите и посетителите ќе создадат чувство на прослава и удобност.

Лизгалиште во Принцовата градина

Со доаѓањето на првите студени денови, Ајд Парк Софија во Принцовата градина повторно ќе стане место за зимска забава. Големото лизгалиште во срцето на раздвижениот град се протега на околу 4.000 квадратни метри. Тука ќе можете да изнајмите лизгалки и да се спуштите по посебната уличка за похрабрите или да ги изберете симулаторите за почетници. А веднаш до мразот, ќе се појави уште еден божиќен пазар со ароматична храна, топли пијалоци и концерти од омилени изведувачи.

Рачно изработени подароци меѓу урнатини од античко време

Доколку барате оригинални божиќни подароци и уметнички дух, можете да го посетите Миш Маш Фест Божиќно издание 2025. Базарот ќе се одржи од 12 до 14 декември во Ларго во близина на античкиот комплекс Сердика во срцето на нашата древна престолнина. Организаторите поканија бугарски уметници и дизајнери кои ќе понудат рачно изработени производи, керамика, накит, додатоци и божиќни задоволства за непцето. Ќе има и креативни работилници, музички изведби, како и разни иницијативи кои ќе придонесат за празничната атмосфера на градот.

Вино и зимско расположение

На 14 декември, среде светлата на Софија, Божиќниот пазар на вино 2025 повторно ги отвора своите врати . Еднодневниот настан ќе се одржи во елегантната атмосфера на Централниот воен клуб. Гостите ќе можат да се сретнат со 23 изложувачи и да дегустираат вкупно 200 видови вина од стари берби и внимателно одбрани сорти. Некои од нив се достапни само во винарските визби. Ќе има и дегустации на врвни вина од внимателно одбрани увозници од странство, како и ограничени бутички серии од Бугарија.

Се очекува и соседските пазари да внесат атмосфера и топлина во урбаната средина, со рачно изработени декорации, музика и работилници за деца. Софија повторно ќе личи на зимска бајка… само ако зимата одлучи да нè израдува со снег!

Извор:https://tribuna.mk/