Бугарија ќе биде домаќин на Светските игри за спортисти со Даунов синдром во 2026 г.

За време на Европското првенство во атлетика и тенис за спортисти со Даунов синдром што се одржува во Прага, тимот на Федерацијата за адаптирана физичка активност официјално ја претстави Бугарија како домаќин на Светските игри во 2026 г., јавува БНР.

На свечената презентација беа откриени детали за овој голем спортски форум кој ќе се одржи од 13 до 19 јуни наредната година во Софија. Настанот ќе ги обедини учесниците од целиот свет во дух на пријателство, почитување и инспирација. Предвидено е натпреварување во пет спортски дисциплини: атлетика, ритмичка гимнастика, спортска гимнастика, тенис и пинг-понг.

„Ова нема да биде само натпревар – тоа ќе биде празник на човечкиот дух. Секоја трка и секоја насмевка ќе покажат дека соништата немаат граници“, истакна бугарската делегација за време на презентацијата.

Светското првенство во 2026 година ќе биде прв ваков настан од овој ранг, посветен исклучиво на спортисти со Даунов синдром, што ќе се организира во Бугарија. Настанот се реализира под патронатот на светската организација SUDS, која е одговорна за унапредување на врвните спортски достигнувања на спортистите со Даунов синдром.

„Нашиот главен град ќе биде сцена не само за спортски резултати, туку и за човечки приказни кои ќе го инспирираат целиот свет“, изјави Слав Петков, претседател на Федерацијата за адаптирана физичка активност за Бугарското национално радио.

Тој го прокоментира и настапот на бугарските натпреварувачи во првите два дена од Европското првенство, каде што бугарските спортисти освоија три златни, едно сребрен и еден бронзен медал, а исто така поставија и нов европски рекорд на трчање 100 метри.

Извор:https://tribuna.mk/