Видете ги фреските на Светите браќа Кирил и Методиј што се „скриени“ во Ватикан

Малкумина бугарски туристи знаат дека во Ватикан, покрај познатите базилики „Санта Марија Маџоре“, „Сан Клементе“ и „Санта Праседе“, постојат три исклучителни дела посветени на светите браќа Кирил и Методиј – основоположниците на словенската писменост. Овие уметнички и духовни споменици се наоѓаат во самото срце на католицизмот и претставуваат дел од европската културна историја, пишува бугарскиот дневен весник 24 часа.

Првото сведоштво за почитта кон свети Кирил се наоѓа во Сикстинската сала на Ватиканската библиотека, изградена од Доменико Фонтана во периодот 1585–1588 година. На столбовите на оваа монументална сала со фрески од Џовани Гуера и Чезаре Небија, меѓу изумителите на светските азбуки е прикажан и свети Кирил – создател на глаголицата. Тоа е најстарото ватиканско признание за делото на словенскиот просветител, старо повеќе од четири века.

Второто свето место е подземната капела „Св. св. Кирил и Методиј“ под базиликата „Св. Петар“. Капелата, која се наоѓа во познатите „свети гробници“ (Sacrae Grotte), била осветена на 2 ноември 1981 година од папата Јован Павле II, една година откако ги прогласил браќата за покровители на Европа. Во центарот на капелата се издига бронзен триптих на скулпторот Томазо Џисмонди, кој ги прикажува Свети Бенедикт и Светите браќа Кирил и Методиј како симболи на духовното единство меѓу Истокот и Западот.

Третото уметничко сведоштво се наоѓа во олтарот на свети Вацлав во северниот трансепт на базиликата „Св. Петар“. Таму, од двете страни на централниот мозаик што го прикажува мачеништвото на свети Вацлав, се поставени два овални портрета во мозаици на Кирил и Методиј, создадени според нацртите на италијанскиот уметник Анджело Карозели во XVII век.

Овие три споменици ја создаваат малку позната „патека на Кирил и Методиј во Ватикан“, која сведочи дека делото на словенските просветители не е само национално, туку европско и универзално наследство.

Иако илјадници туристи секојдневно минуваат низ Ватикан, само малкумина знаат дека токму таму, во духовното седиште на католичкиот свет, живее споменот на браќата кои им ја подарија писменоста на словенските народи.

Извор:https://tribuna.mk/