Бугарија слави 117 години од прогласувањето на својата независност

На 22 септември 1908 година, во старата бугарска престолнина Велико Трново, се одржал историскиот чин на „Свеченото прогласување на Северна и Јужна Бугарија за независно Царство“. Со овој акт, Бугарија не само што станува независна држава, туку и официјално се заокружува процесот на Соединувањето од 1885 година на Кнежевството Бугарија со Источна Румелија, пишува БГНЕС.

Три се клучните датуми во најновата бугарска историја што го бележат патот кон независноста: 3 март 1878 година – ослободувањето од петвековното османлиско ропство и создавањето на Третото бугарско царство; 6 септември 1885 година – Соединувањето на Кнежевството Бугарија со Источна Румелија; и 22 септември 1908 година – прогласувањето на независноста и возвишувањето на Бугарија во рамноправен член на европското семејство на држави.

Цар Фердинанд I, во присуство на владата и јавни личности, во црквата „Св. Четириесет маченици“ во Трново, го прочитал Манифестот кон бугарскиот народ и прогласил: „…Прогласувам обединетата на 6 септември 1885 година Бугарија за независно Бугарско царство… Да живее слободна и независна Бугарија! Да живее бугарскиот народ!“.

Со овој чекор Бугарија ја отфрлила својата вазална зависност од Османлиската империја и добила право самостојно да води надворешна политика, да склучува сојузи и да регулира сопствен царински режим. Независноста била дипломатски призната во 1909 година со посредство на Русија и со договор со Османлиската империја и големите сили.

Денеска, 117 години подоцна, централната државна прослава повторно се одржува во Велико Трново. Претседателката на Народното собрание, Наталија Киселова, присуствува на празничната Света литургија во црквата „Св. 40 маченици“, служена од Великотрновскиот митрополит Григориј, со учество на квартетот „Ангелски гласови“.

Киселова ќе присуствува на воениот ритуал за кревање на националното знаме на „Царевец“, ќе одржи свечен говор и ќе поднесе цвеќе на Споменикот на Независноста. Таа ќе учествува и во празничната поворка и полагањето венци на споменикот „Мајка Бугарија“.

Во вечерните часови е предвидена свеченост на плоштадот „Цар Асен I“, на која Киселова ќе го прими рапортот од командантот и повторно ќе се обрати до граѓаните. Настанот ќе биде придружен од музичкиот спектакл на XVIII Меѓународен фестивал на воени оркестри.

Празнична програма е организирана и во главниот град Софија. Свеченоста започнува во 11:00 часот пред Споменикот на Независноста на плоштад „Кнез Александар I“.

Во културната програма учествуваат Националната гарда, вокалните квартети „Славеј“ и „Светоглас“, актерката Василка Сугарева, како и Софискиот духов оркестар под диригентство на Васил Делиeв.

Прославата продолжува со фолклорен концерт со учество на ансамблите „Средец“ и „Здравец“, а ќе бидат изведени и познатите ора на Дико Илиев. Настанот е дел од Календарот на културни настани на град Софија и се организира од Столична општина.

Извор:tribuna.mk