Бугарија се враќа на „Евровизија“ по тригодишна пауза – ќе учествува на јубилејното 70-то издание во Виена во 2026 година

По три години отсуство, Бугарија повторно ќе учествува на престижниот натпревар „Евровизија“, чиј јубилеен 70-ти фестивал ќе се одржи во мај 2026 година во Виена, Австрија, соопшти Бугарската национална телевизија (БНТ).

Во наредните месеци ќе се одвива националната селекција, преку која ќе бидат избрани бугарскиот претставник и песната за натпреварот. Деталите за форматот и критериумите за избор ќе бидат објавени дополнително.

Според официјалниот распоред, двете полуфинални вечери на „Евровизија 2026“ ќе се одржат на 12 и 14 мај, а големото финале – на 16 мај. Домаќин на натпреварот ќе биде Виена, по победата на австрискиот пејач JJ со песната Wasted Love на овогодинешното издание во Базел.

„Евровизија“ останува еден од најгледаните телевизиски музички натпревари во светот – последното издание привлече 166 милиони гледачи од 37 земји учеснички и уште над 100 држави што гласаа онлајн.

Директорот на натпреварот, Мартин Грин, го поздрави враќањето на Бугарија, изјавувајќи дека тоа е „уште еден доказ дека Европа останува обединета преку музиката“.

Извор:https://tribuna.mk/